لوقمان کەمال محمد
گۆمێکی وشک کە تێیدا ماسییەکان لە تینوویەتیدا دەمرن، بەڵام پاسەوانەکانی گۆمەکە ڕۆژانە دێن و بە دەنگی بەرز باسی هاتنی لافاو و بارانی ڕەحمەت دەکەن، لەکاتێکدا خۆیان لە پشتی گردەکەوە بەنداوێکیان دروست کردووە و تەواوی ئاوەکە دەبەن بۆ کێڵگە تایبەتەکانی خۆیان! لێرەدا کێشەکە بێبارانی نییە، بەڵکو دزینی ئاوەکەیە لەلایەن ئەوانەی کە درۆی خەمخۆری دەکەن! ئەمە ڕێک وێنەی ئەو کارەساتەیە کە ئەمڕۆ بە ناوی حکومەتی هەرێمەوە بەسەر کۆمەڵگای ئێمەدا سەپێنراوە؛ کابینەکەی مەسرور بارزانی کە بە دروشمی ساختەی چاکسازی هاتە مەیدان، بەڵام لە واقیعدا ژیانی مامۆستا و فەرمانبەری کردە قوربانیی ئابووریی سێبەر، و مووچەشی کردە وەهمێکی ئەبەدی کە تەنها بۆ کڕینەوەی کاتی و بێدەنگکردنی خەڵک بەڵێنی پێ دەدرێت !
لەم نیشتمانەدا، کاتێک دەسەڵاتداران باسی ڕێککەوتنی سیاسی دەکەن بۆ دابینکردنی مووچە، لە ڕاستیدا تەنها خەریکی کڕینی کاتن بۆ ئەوەی داهاتی قاچاخی سنوور و نەوتی دزراو زیاتر بچێتە ناو گیرفانی حیزبەوە. ئەمە کابینەیەک نییە کە بەدوای چارەسەردا بگەڕێت، بەڵکو کارگەیەکە بۆ بەرهەمهێنانی قەیرانی دروستکراو. ئەوان ژیانی خەڵکیان خستووەتە سەر ئامێری هەناسەدانی دەستکرد، بۆ ئەوەی هاوڵاتی هێندە سەرقاڵی چاوەڕوانیی پاروویەک نان بێت، کە هیچ کات و بوێرییەکی نەمێنێت پرسیار لەسەر خەزێنەی بەتاڵکراو و کۆمپانیا قۆرخکارەکان بکات.
نیکۆلۆ مەکیاڤێلی دەڵێت: “بەڵێنێک کە درا، پێویستیی ڕابردوو بوو؛ بەڵام شکاندنی ئەو بەڵێنە، پێویستیی ئێستایە” ! ئەم حەقیقەتە تاڵە ڕێک پێناسەی ئەو مۆدێلەیە کە لە سەدەکانی ناوەڕاستدا پاشاکان پەیڕەویان دەکرد، کاتێک لە کاتی قەیرانەکاندا بەڵێنی دابینکردنی نان و ئاسایشیان بە خەڵک دەدا، بەڵام هەرکە تووڕەییەکە دادەمرکایەوە، دەستبەجێ باجی قورستریان دەسەپاند و خەزێنەکانیان بۆ جەنگ و کۆشکەکانی خۆیان بەتاڵ دەکرد! ئەمڕۆ لە هەرێمی کوردستانیشدا هەمان فێڵی مێژوویی پەیڕەو دەکرێت؛ کابینەکەی مەسرور بارزانی، هەموو مانگێک بەڵێنی درۆینەی دابینکردنی مووچە دەداتە فەرمانبەران، بەڵام کاتێک وادەی جێبەجێکردن دێت، داهاتەکان لەناو قەسابخانەی حوکمی خێزانیدا ون دەبن و متمانەی خەڵکیش دەکرێتە قوربانیی ئەو درۆیە گەورەیەی کە ناویان ناوە چاکسازی !
لە سایەی ئەم دۆخەدا، پەرلەمانی بێدەنگکراو و حکومەتی ئیفلیجکراو بوونەتە تەنها دوو دیواری بێگیان کە دەسەڵات لە پشتیانەوە خەریکی تاڵانییە. هەر دەنگێکی خنکێنراویش کە داوای مافی خۆی بکات، دەستبەجێ بە پەڕاوی دروستکراو و دادگاکانی کارتۆنی وەڵام دەدرێتەوە. فەرمانبەر لێرەدا چیتر چاوەڕێی ڕێککەوتنەکانی هەولێر و بەغدا ناکات، چونکە تێگەیشتووە کە کێشەکە لە ڕێککەوتندا نییە، بەڵکو لەو گیرفانە دڕاوانەدایە کە هیچ بڕە پارەیەک تێریان ناکات.
کاتی ئەوە هاتووە کۆتایی بەو خەوە ترسناکە بهێنین کە گوایە ئەم دەسەڵاتە مافەکانمان بۆ دەگەڕێنێتەوە. ئەم نوخبە ترسنۆکە کە گاڵتە بە چارەنووسمان دەکات، لە تووڕەیی و یەکگرتوویی ئێوە زۆر زیاتر دەترسێت تا لە هەر شتێکی تر، چونکە مێژوو سەلماندوویەتی کاتێک گەلێک بڕیاری شکانەوەی بێدەنگی دەدات، لافاوی ڕاستی هەم دادگاکانی کارتۆنی و هەم کۆشکەکانی تاڵانچییان بۆ هەمیشە لە ڕەگەوە هەڵدەتەکێنێت !
Leave a Reply