هەستیار بورهان محمد
لە یەکێک لە تاریکترین و سەیرترین داهێنانەکانى هەرێمی کوردستاندا، کابینەکەی مەسرور بارزانی توانیویەتی مۆدێلێکی سەرمایەداریی هێندە دڕندانە بخولقێنێت کە تێیدا فەرمانبەر و هاوڵاتیی سادە چیتر وەک خزمەتکاری گشتی یان خاوەن مافێکی نیشتمانی سەیر ناکرێت، بەڵکو بە شێوەیەکی سیستماتیک و بێبەزەییانە گۆڕاوە بۆ تەنیا “کڕیارێک” و سەرچاوەیەکی داهات بۆ پڕکردنەوەی خەزێنە خاڵییەکەی حکومەت! لەم سیستەمە گاڵتەجاڕییەدا، کاتێک کاتی پێدانی ماف و مووچەی مامۆستایان، پزیشکان، و کرێکاران دێت، دەسەڵاتداران بەوپەڕی ساردییەوە باس لە “قەیرانی دارایی”، “کێشەی سیولە”، و “نەناردنی پارە لە بەغداوە” دەکەن و وەها خۆیان نیشان دەدەن کە حکومەتێکی زۆر هەژار و مایەپووچن،
بەڵام هەر کە دەگاتە کاتی کۆکردنەوەی پارە، لەناکاو ئەم حکومەتە مایەپووچە دەگۆڕێت بۆ کۆمپانیایەکی زەبەلاحی کۆکردنەوەی قەرز و وەکو خاوەن کۆمپانیایەکی بێڕەحم، پسوولەی گرانی کارەبای پێوەری زیرەک، باجی ئاو، ڕسووماتی زبڵ و خاشاک، و دەیان جۆری تری باج دەخاتە سەر شانی هەمان ئەو فەرمانبەرەی کە چەندین مانگە یەک دیناری وەرنەگرتووە. ئەمە لوتکەی داڕمانی مۆڕاڵی ئیدارییە کاتێک باوکێکی ماندوو، پێش ئەوەی پاداشتی ئارەقەی ناوچەوانی بۆ خزمەتکردنی وڵاتەکەی پێبدرێت، دەبێت وەک کڕیارێکی ناچار مامەڵەی لەگەڵدا بکرێت و پارەی ئەو خزمەتگوزارییانە بدات کە لە بنەڕەتدا مافی خۆیەتی. حکومەتێک کە سەردەمانێک باسی “ئابووریی سەربەخۆ”ی دەکرد و نەوتەکەی بە ناوی خۆشگوزەرانییەوە دەفرۆشت، ئێستا هێندە ئیفلیج بووە کە گەورەترین سەرچاوەی داهاتی بووەتە گیرفانی دڕاوی خەڵکەکەی. ئەوانەی لە کۆشکە فێنکەکانیاندا دانیشتوون، باکیان بەوە نییە کە فەرمانبەرێک چۆن کرێی هاتوچۆ دابین دەکات یان چۆن شیری منداڵەکەی دەکڕێت،
بەڵکو تەنیا خەمیان ئەوەیە کە ئەم مانگە چەند پارە لە ڕێگەی پێوەرە زیرەکەکانەوە دەچێتە خەزێنەی کۆمپانیا حزبییەکانەوە. مەسرور بارزانی دەیەوێت هاوڵاتیی کورد تەنیا وەک ئامێرێکی پارەدان بۆ دەسەڵات کار بکات، و کاتێکیش داوای مووچە دەکات، وەک بارگرانییەک بۆ سەر حکومەت ناوی ببات؛ کە ئەمەش مەترسیدارترین قۆناغی دابڕانی نێوان هاوڵاتی و دەوڵەتە لەم هەرێمەدا، چونکە نیشتمان بۆ ئەوان بووەتە تەنیا مۆڵێکی گەورەی بازرگانی و خەڵکیش کڕیارێکی برسیی ناچارە
Leave a Reply