سەربەست حوسێن مەحموود
لە ناو بونیادی دەسەڵاتی پارتی دیموکراتی کوردستان و سیستمی حوکمڕانیی هەرێمی کوردستاندا، بەراوردکردنی ڕەفتاری سیاسیی سەرۆکی هەرێم نێچیرڤان بارزانی و سەرۆکی حکومەت مەسرور بارزانی، ئاماژەیەکی ڕوونە بۆ بوونی دوو مۆدێل و کلتووری سیاسیی جیاواز لە ناو یەک حیزبدا، بە بێ ئەوەی پێویست بکات بچینە ناو باسی ململانێی شەخسییەوە؛ چونکە نێچیرڤان بارزانی هەمیشە وەک ڕووخساری دیپلۆماسی، گفتوگۆ،
دروستکردنی هاوپەیمانی، دروستکردنی تەباگیریی کۆمەڵایەتی و سیاسی، و نەرمیی زۆنەکان پێناسە کراوە و هەوڵی داوە پرۆسەی سیاسی لە ڕێگەی هاوسەنگی و گفتوگۆوە ئاڕاستە بڕکات، لە کاتێکدا مەسرور بارزانی سیمای سیاسیی خۆی لەسەر بنەمای دەسەڵاتی جێبەجێکردنی ڕەها، ئاسایش، کۆنترۆڵی ئیداری، دیسیپلین، و سەپاندنی سەروەریی حکومەت بونیاد ناوە. پرسیاری جەوهەری لێرەدا ئەوەیە کە ئایا ئەم دوو شێوازە تەواوکەری یەکترن لە برەودان بە دەوڵەتداری، یان لە واقیعدا دروستکەری بەریەککەوتن، تێکچوونی چاوەڕوانییەکان و سەرگەردانیین لە ناو هۆڵەکانی پارتی و تەواوی هەرێمی کوردستاندا؟
کاتێک شێوازێک جەخت لەسەر سازش، دیپلۆماسیەت و نەرمبوونەوە لەگەڵ بەغدا و حیزبە ڕکابەرەکان دەکاتەوە، و شێوازەکەی تر بە تووندی و بە بێ سازش بەگژ داواکارییەکاندا دەچێتەوە، کلتوورێکی ئیداریی دووفاقیانە لە ناو دامەزراوە حکومی و ئەمنییەکاندا سەرهەڵدەدات کە تێیدا فەرمانبەران و بڕیاربدەران نازانن کام لۆجیک پەیڕەو بڕکەن. ئەم جیاوازییە لە ڕەفتاری سیاسی، هاوڵاتییانی لە ناو هەڵپەسێردراوییەکی بەردەوامدا ڕاگرتووە؛ چونکە شێوازی یەکەم بەڵێنی سەقامگیری و هێورکردنەوە دەدات و شێوازی دووەمیش بەڵێنی چۆکدانەدان و سەپاندنی یاسا، بەڵام لە کرداردا جەماوەر باجی فەشەل و ڕاوەستانی کارەکانی وڵات دەدات. لە کۆتاییدا، ئەم دووفاقییە سیاسییە، بێزارانە تەنها یەک ڕاستیمان بەڕوودا دەپەکێنێتەوە: بارزانییەکیان بە زمانی دیپلۆماسیەت قسە دەکات و بارزانییەکەی تر بە زمانی دەسەڵاتی جێبەجێکردن—لە کاتێکدا هاوڵاتیی ئاسایی تا ئێستاش بێئومێدانە چاوەڕێیە ببێنێت کە لە ئۆپەراسیۆن و بەرئەنجامدا، بە ڕاستی کام لەم دوو زمانە بەرهەم و ئازادی دروست دەکات!
Leave a Reply