ڕابەر خدر عمر
لە مێژووی حوکمڕانیی هەرێمی کوردستاندا، پارتی دیموکراتی کوردستان و یەکێتیی نیشتمانیی کوردستان هاوکێشەی “پەنجا بە پەنجا”یان وەک چارەسەرێک هێنایە ئاراوە بۆ ئەوەی ڕێگری بکەن لە قۆرخکاریی سیاسی و باڵادەستیی تاکلایەنە. بەڵام دوای دەیان ساڵ لە جێبەجێکردنی ئەم مۆدێلە، ڕوون بووەتەوە کە ئەم هاوکێشەیە لەبری ئەوەی ببێتە هۆکارێک بۆ هاوبەشیکردنی بەرپرسیارێتی و خزمەتکردنی وڵات، تەنیا بووەتە ئامرازێک بۆ “هاوبەشیکردنی پۆست، ئیمتیازات، و دەسەڵات”. هەردوو حزبەکە خاوەنی هەژموونێکی زەبەلاحی سیاسی و ئەمنین، و لە ڕووی کردارییەوە تەواوی جومگەکانی وڵاتیان لەژێر دەستدایە؛ بەڵام کاتێک قەیرانێک ڕوو دەدات، مووچە دەبڕدرێت، یان دامەزراوەکان تووشی ئیفلیجی دەبن، هاوکێشەی پەنجا بە پەنجا لەناکاو نامێنێت و هەر لایەنە بەرپرسیارێتیی شکستەکە دەخاتە ئەستۆی ئەوی تر. ئەوان لەسەر دابەشکردنی خاڵە سنوورییەکان و پۆستە باڵاکان شەریکی یەکترن، بەڵام کاتێک دێتە سەر باجدان، هیچ کامیان ئامادە نین نیوەی بەرپرسیارێتییەکە هەڵبگرن!
نموونەی هەرە دیاری ئەم گاڵتەجاڕییە سیاسییە، پرۆسەی پێکهێنانی حکومەت و کاراکردنی پەرلەمانە. دوای تێپەڕبوونی چەندین مانگ بەسەر هەڵبژاردنەکانی تشرینی یەکەمی ٢٠٢٤، هێشتا کابینەی نوێ پێک نەهاتووە چونکە هەردوو حزبەکە خەریکی شەڕی بەدەستهێنانی پۆستی زیاتر و وەزارەتە سیادییەکانن. خەڵکی ئاسایی ڕۆژانە گوێیان لە هەواڵی کۆبوونەوە و “لێکتێگەیشتنەکان”ی نێوان ئەم دوو حزبەیە لەسەر دابەشکردنی کورسییەکان، لە کاتێکدا ئەوەی خەڵک دەیەوێت، دامەزراوەی کارا، خزمەتگوزاریی سەرەتایی، و سەقامگیریی ئابوورییە. پێکهێنانی حکومەت نابێت ببێتە کارتی فشار لە بازاڕی سەودا و مامەڵەی حزبیدا کە تێیدا ژیانی میللەتێک دەکرێتە قوربانیی ململانێی دوو بنەماڵە یان دوو ئاراستەی جیاواز.
ئەوەی ئێستا دەگوزەرێت، تابلۆیەکی زۆر سارکاستیکە: سەدا ٥٠ی وڵات هی پارتییە، سەدا ٥٠کەی تری هی یەکێتییە، بەڵام دیارە ئەو سەدا سفرەی کە ماوەتەوە، پشکی هاوڵاتییانە لەم حوکمڕانییەدا! پرسیارە گاڵتەجاڕانەکە ئەوەیە: ئەگەر هەردوو حزبەکە هێندە هێزیان هەیە کە بەتەواوی سیستەمەکە کۆنتڕۆڵ بکەن و دابەشی بکەن، بۆچی هیچ کامیان ئەوەندە “بەرپرسیارێتییان” نییە کە سیستەمەکە چاک بکەنەوە یان لانیکەم حکومەتێک پێکبهێنن کە مووچەی خەڵک بدات؟!
Leave a Reply