ڕزگار کانابى
لە هەموو سیستەمێکی سیاسیی هاوچەرخ و ئاساییدا، قەیرانەکان و ناکۆکییە ناوخۆییەکان وەک دۆخێکی نائاسایی، نەخوازراو و زۆر “کاتی” تەماشایان دەکرێت کە تەواوی دامەزراوەکان هەوڵەکانیان لەپێناو چارەسەرکردنی خێرا و ئاساییکردنەوەی ڕەوشەکەدا جێبەجێ دەکەن؛ بەڵام لە هەرێمی کوردستاندا داهێنانێکی سەیر و بێوێنە لە ڕامکردن و ئاساییکردنەوەی قەیرانەکاندا کراوە، بە جۆرێک کە دەستەواژەی “کاتی” بووەتە درێژخایەنترین، نەگۆڕترین و باوترین چەمک لە فەرهەنگی حکومەتداری و کایەی گشتیدا. لێرەدا ناکۆکییە سیاسییە “کاتی”یەکان زۆر بە هێمنی هەنگاو دەنێن و دەبنە ئاراستەیەکی درێژخایەنی چەندین مانگە و چەندین ساڵە، دواخستنی “کاتی”ی دانیشتنەکانی پەرلەمان، پێکنەهێنانی کابینەی نوێ و ڕاگرتنی پڕۆژە خزمەتگوزارییەکان بە خێرایی دەبنە واقیعێکی سیاسیی داسەپاو و چەسپاو، و پەککەوتنی دامەزراوە نیشتمانییەکانیش بە تەواوی ئاسایی دەکرێنەوە و دەکرێنە بەشێک لە فەرهەنگی ژیانی ڕۆژانەی جەماوەر. مەترسیدارترین زەنگی ئاگەدارکردنەوە لەم کۆمەڵگەیەدا ڕێک لەو ساتەدا لێدەدات کە هاووڵاتییان هێواش هێواش لە پرسیارکردن دەربارەی ئەوەی
“کەی ئەم دۆخە نەخوازراوە کۆتایی پێدێت؟” بێزار و ماندوو دەبن، و لەبری داواکردنی مافە دەستوورییەکانیان یان سزادانی دەسەڵاتداران لە ڕێی متمانەپێدانەوە، ڕاهێنان بە هۆش و دەرونی خۆیان دەکەن تا لەگەڵ ئەم فەوزا و سەرگەردانییە بەردەوامەدا هەڵبکەن و بژین. ئەگەر بمانەوێت مۆدێلی کارکردنی ئەم دەستەبژێرە سیاسییە پێناسە بوبکەین، دەبێت بڵێین: “لە کوردستاندا، دەستەواژەی کاتی ڕێک واتە: تا ئەو کاتەی تەواوی خەڵک و کۆمەڵگە لەبیریان دەچێتەوە بۆچی لە بنەڕەتدا بڕیار بوو ئەم دۆخە کۆتایی پێبێت!” ئەم شێوازە لە ئاساییکردنەوەی شلەژان و پەککەوتن، زۆر مەترسیدارتر و کوشندەترە لە ڕوودانی قەیرانێکی سیاسیی گەورە یان کارساتبار؛ چونکە قەیرانی ڕاستەقینە بزوێنەرە و خەڵک بۆ گۆڕانکاری دەجووڵێنێت، بەڵام ئاساییکردنەوەی بێسەروبەری،
کۆمەڵگە تووشی سڕبوونی فکری و بێهیواییەکی قووڵ دەکات، بە جۆرێک کە بنەماکانی داواکاری، لێپرسینەوە و شۆڕشکردن لە دژی گەندەڵی دادەماڵێت. کاتێک سیاسییەکان سەرکەوتوو دەبن لە دروستکردنی فەرهەنگێک کە تێیدا دواخستن دەبێتە نەریت، ئیتر هاووڵاتی وەک تەماشاکەرێکی بێئومێد دەمێنێتەوە کە هیچ هیوایەکی بە ئەنجامی پرۆسە سیاسییەکان نەماوە. لە کۆتاییدا، گەورەترین و مەترسیدارترین سەرکەوتنی ئەم پەککەوتنە سیاسییە بەردەوامە، تەنیا ڕاگرتن، سڕکردن و جەمدکردنی دامەزراوە نیشتمانییەکان نییە لە پێشکەشکردنی خزمەتگوزاری، بەڵکو چاندنی ئەو باوەڕە هێمن و مەترسیدارەیە لە مێشک و هۆشی هاووڵاتییاندا کە گوایا دامەزراوە بێکار، ئیفلیج و جەمدکراوەکان، دۆخێکی زۆر سروشتی، ئاسایی و نەگۆڕی ژیانن کە دەبێت بە بێدەنگی قبووڵی بوبکەن و هیچی تری لێ نەخوازن.
Leave a Reply