ئاکام خالید
نەخۆشێک کە لەسەر جێگای مەرگ کەوتووە، بەڵام لەبری ئەوەی پزیشکەکان چارەسەری بکەن، دەوریان گرتووە و خەریکی زۆرانبازین لەسەر ئەوەی کێیان زووتر و زیاتر جلوبەرگ و کاتژمێر و تەنانەت ئەندامەکانی جەستەی نەخۆشەکە بفرۆشێت! لێرەدا پرسیارەکە ئەوە نییە کە ئایا نەخۆشەکە دەژی یان دەمرێت، بەڵکو ئەوەیە کەی پارچە پارچە دەکرێت! ئەمە ڕێک وێنەی ئەو کارەساتەیە کە ئەمڕۆ لە عێراق و هەرێمی کوردستاندا ڕوو دەدات؛ نیشتمانێک کە لەلایەن هێزە چەکدارەکانی بەغدا و خێزانە دەسەڵاتدارەکانی هەولێر و سلێمانییەوە ڕفێنراوە، و دامەزراوەکانیش لەبری ئەوەی هیوا بن بۆ ژیان، بوونەتە مەیدانی شەڕی دابەشکردنی دەستکەوتەکان و لەناوبردنی تەواوەتیی متمانەی گشتی!
کاتێک تفەنگەکان لە بەغدا بڕیار لەسەر دەستوور دەدەن، و لە هەولێر و سلێمانیش بازرگانی بە دەنگ و مووچەی هاوڵاتییانەوە دەکرێت، ئیتر درۆی نیشتمانپەروەری بەتەواوی ئابڕووی دەچێت. لە ژێر سایەی ئەم دوو ئیدارەییە و دەسەڵاتە میلیشیاییەدا، یاسا هیچ نییە جگە لە پەردەیەک بۆ شاردنەوەی ئابووریی سێبەر و قاچاخی سنوور. ئەوانەی لە ڕاگەیاندنەکاندا شمشێر لەسەر یەکتر هەڵدەکێشن، لە تاریکیدا پێکەوە خەریکی دابەشکردنی نەوتی دزراو و خەزێنەی بەتاڵکراوی ئەم گەلەن.
“مێژوو خۆی دووبارە دەکاتەوە، جاری یەکەم وەک تراژیدیا، جاری دووەم وەک گاڵتەجاڕی”! ئەم حەقیقەتە ڕێک پێناسەی ئەو شانۆگەرییە قێزەونە دەکات کە ئەمڕۆ ئێمە تێیدا دەژین؛ هاوشێوەی دۆخی کۆتاییەکانی ئیمپراتۆریەتی عوسمانی، کاتێک پاشاکان لەناو کۆشکەکانیاندا خەریکی شەڕەدەسەڵات و کڕین و فرۆشتنی پۆستەکان بوون، لەکاتێکدا وڵات لەوپەڕی داڕماندا بوو و گەل لە برسێتیدا دەیناڵاند! ئەمڕۆ لە نیشتمانی ئێمەشدا، هەمان گاڵتەجاڕیی مێژوویی بەڕێوە دەچێت؛ تاڵانچییەکان لە نێوان خۆیاندا شەڕی داهات دەکەن، بەڵام کاتێک دێتە سەر لێپرسینەوە و داواکاریی خەڵک، هەموویان پێکەوە یەک دەگرن بۆ سەرکوتکردنی مەدەنی و دروستکردنی پەڕاوی ساختە دژی دەنگە ناڕازییەکان!
ئەمە ئەو دۆخەیە کە تێیدا پەرلەمانی بێدەنگکراو و حکومەتی ئیفلیجکراو، تەنها وەک پاسەوانێک بۆ پاراستنی بەرژەوەندییەکانی کۆمپانیاکانی حیزب کار دەکەن. لە بەغدا، بڕیارە چارەنووسسازەکان لە دەرەوەی دامەزراوەکان دەدرێن، و لە کوردستانیش، دەنگی خنکێنراوی ڕۆژنامەنووسان و چالاکوانان لە زیندانە تاریکەکاندا کپ دەکرێت تا هیچ کەس پرسیار لەسەر قۆرخکاری بازاڕ نەکات. ئیدی متمانە بە دەوڵەت و دامەزراوەکان نەماوە، چونکە هاوڵاتی تێگەیشتووە کە ئەمە دەوڵەت نییە، بەڵکو کۆمپانیایەکی زەبەلاحی حیزبەکانە و ئەوانیش تەنها کرێکارێکی بێمافن تێیدا.
ئەی ئەو مامۆستایانەی لە چاوەڕوانیی مووچەدا کەرامەتتان بریندار کراوە، ئەی ئەو گەنجانەی خەونەکانتان لەژێر چەپۆکی ئەم قۆرخکارییەدا بووەتە خۆڵەمێش، و ئەی تەواوی ئەو هاوڵاتییانەی باجی ئەم زۆرانبازییەی بەغدا و هەرێم دەدەن! کاتی ئەوە هاتووە کۆتایی بەو درۆیە بهێنین کە گوایە چارەسەر لە دەستی ئەم نوخبە تاڵانچییەدایە. ئەم دەسەڵاتە ترسنۆکە کە لە پشتی چەک و میدیای سێبەرەوە خۆی حەشار داوە، لە یەکگرتوویی و هاواری ئێوە زۆر زیاتر دەترسێت تا لە ململانێکانی نێوان خۆیان، چونکە باش دەزانن کاتێک ئەم گەلە لە خەو ڕادەپەڕێت، لافاوی دادپەروەری هەم تفەنگی میلیشیاکان و هەم کۆشکی قۆرخکاران بۆ هەمیشە ڕاماڵێت!
Leave a Reply