مةروان عبدالباقي أحمد
حکومەت دواجار دوای زیاتر لە سێ دەیە توانی موعجیزەیەک بخولقێنێت و لەناکاو “کارەبا دۆزییەوە”، بەڵام لە هەمان ساتدا و بە شێوەیەکی زۆر سیحراوی، هاوڵاتییان و فەرمانبەران “مووچەکانیان لێ ون بوو”! ئەمە ئەو تابلۆ گاڵتەجاڕییەیە کە تێیدا دەسەڵاتداران لەسەر شاشەی تەلەفزیۆنەکانەوە بە قات و ڕیباتی کەشخەوە دەردەکەون و بەوپەڕی شانازییەوە ڕایدەگەیەنن کە پڕۆژەکانی ژێرخان و پێوەری زیرەک سەرکەوتنی گەورەیان بەدەستهێناوە و ئیتر “کوردستان ڕووناک بووەتەوە”، بەڵام بە ئەنقەست خۆیان لەو ڕاستییە تاڵە کوێر دەکەن کە ئەو کارەبایەی ئەوان دۆزیویانەتەوە، تەنیا ژووری خاڵی و سکی برسیی هاوڵاتییان ڕووناک دەکاتەوە. کاتێک بەرپرسان ئاهەنگی ئەم “دەستکەوتە مێژووییە” دەگێڕن و شریتی پڕۆژە وەهمییەکانیان دەبڕن، مامۆستایەک یان پزیشکێکی ماندوو لە ماڵەکەیدا دانیشتووە، سەیری گڵۆپە داگیرساوەکەی بنمیچی ژوورەکەی دەکات و لە ناخەوە دەسوتێت؛ چونکە ئەو گڵۆپە ڕووناکە هەرگیز ناتوانێت شیری منداڵەکەی بۆ دابین بکات یان کرێی خانووەکەی بۆ بدات کە چەندین مانگە بەهۆی دواکەوتنی مووچەوە لەسەری کەڵەکە بووە.
حکومەتێک کە ساڵانێک بوو بەڵێنی “ئابووریی سەربەخۆ” و بونیاتنانی “دوبەی ڕۆژهەڵاتی ناوەڕاست”ی دەدا، ئێستا گەیشتووەتە ئاستێک کە وەکو خاوەن قەرزێکی بێبەزەیی مامەڵە لەگەڵ خەڵکەکەی دەکات؛ لە لایەکەوە مووچەکانیان دەبڕێت و گیرفانیان بە تەواوی خاڵی دەکات، لە لایەکی تریشەوە پسوولەی گرانی کارەبا، ئاو و خزمەتگوزارییەکانیان بۆ دەنێرێت و هەڕەشەی بڕینی هەمان ئەو کارەبایەیان لێ دەکات کە تازە بە منەتەوە دۆزیویەتیەوە! ئەمە لوتکەی داڕمانی ئەخلاقی سیاسی و ئیدارییە کاتێک دەسەڵات پێی وایە پێشکەشکردنی خزمەتگوزارییەکی زۆر سەرەتایی وەک کارەبا، دەبێتە پاساوێک بۆ برسییکردنی کۆمەڵگا و لێسەندنەوەی مافە بنەڕەتییەکانیان. ئەو نەوتەی کە بڕیار بوو ببێتە مایەی خۆشگوزەرانی و وڵات بباتە قۆناغێکی تری گەشەسەندن، تەنیا بووە هۆی دەوڵەمەندبوونی بازنەیەکی بچووکی حزبی و کڕینی کۆشک و ڤێلا لە دەرەوەی وڵات، لە کاتێکدا فەرمانبەری داماو دەبێت قەرز لە دوکاندارەکان بکات بۆ ئەوەی تەنیا لە ژیاندا بمێنێتەوە.
ئەم وەهمەی ژێرخان و پڕۆژەی بریقەدار هیچ مانایەکی نامێنێت کاتێک مرۆڤی کورد دەکرێتە قوربانیی قەیرانێکی دارایی دروستکراو کە تێیدا خاوەن ماف دەبێتە قەرزداری دەسەڵات. لە کۆتاییدا، هەرچەندە حکومەت بەردەوام بێت لەسەر ئاهەنگگێڕان بە بۆنەی داگیرسانی گڵۆپەکانەوە و شانازی بە دۆزینەوەی کارەباوە بکات، پرسیارە گەورە و شۆککەرەکە وەک مۆتەکەیەک یەخەیان دەگرێت: باشە باشتربوونی خزمەتگوزارییەکان و هەبوونی کارەبای بیست و چوار کاتژمێری چ بەهایەکیان هەیە، کاتێک هاوڵاتی گیرفانی خاڵییە و توانای ئەوەی نییە پارەی پسوولەکە بدات؟!
Leave a Reply