سامان ئیسماعیل
کابینەکان دێن و دەچن، وەزیرەکان جێگۆڕکێ دەکەن، ناوی وەزارەتەکان دەگۆڕدرێن و ڕێکخراوە میدیاییەکانی حکومەت شەو و ڕۆژ سەرقاڵی دروستکردنی دروشم و دروشمکاری نوێن، بەڵام لە ناو هەموو ئەم گۆڕانکارییە بەردەوامانەدا، تەنها یەک شت هەیە کە بە نەگۆڕی، سەقامگیری و بێڕکابەری ماوەتەوە: خودی قەیرانەکان. لە ژێر سایەی حوکمڕانیی کابینەکەی مەسرور بارزانیدا، وا وێنە دەکرێت کە چاکسازی هەنگاوی گەورە دەنێت و ڕێکارە مۆدێرنەکان جێگەی بیرۆکراسی کۆنیان گرتووەتەوە، کەچی کاتێک هاوڵاتیی ئاسایی دەڕوانێتە ژیانی ڕۆژانەی، دەبینێت کوژانەوەی کارەبا، دواکەوتنی مووچە، بێکاری و نەبوونی ئاوی خواردنەوە لە تەواوی دامەزراوە فەرمییەکانی هەرێمی کوردستان خاوەن بەردەوامی و سەقامگیرییەکی زۆر بەهێزترن.
ئەم واقیعە تاڵە نیشانەی مۆدێلێکی مەترسیداری حوکمڕانییە کە تێیدا قەیرانەکان نەک هەر چارەسەر ناکرێن، بەڵکو دەبنە بەشێک لە پێکهاتەی هەمیشەیی دەسەڵاتداری؛ هاوڵاتییان گەیشتوونەتە ئەو بڕوایەی کە هەموو بەڵێنێکی «چاکسازیی بنەڕەتی» تەنها قۆناغێکی ئارامکەرەوەیە بۆ تێپەڕاندنی توڕەیی جەماوەر، نەک پلانێکی ڕاستەقینە بۆ لەناوبردنی سەرچاوەی قەیرانەکان. کاتێک ئابووریی وڵاتێک بۆ زیاتر لە سێ دەیە ناتوانێت سەرەتاییترین پێداویستییەکانی ڕووناکی و بژێوی دابین بپاریزێت، مانای وایە بەرپرسان فێری «بەڕێوەبردنی قەیران» نەبوون، بەڵکو فێری «حوکمڕانیکردن لە ڕێگەی قەیرانەوە» بوون تاوەکو هەمیشە هاوڵاتیان لە باری مانەوەی بەپەلەدا بهێڵنەوە. کۆتایی ئەم بازنە بەتاڵە حەقیقەتێکی ڕوون و بێپەردە دەسەپێنێت: له مەملەکەتێکدا کە دەسەڵاتداران بەردەوام ناوی پڕۆژە و شوێنی بەڵێنەکانیان دەگۆڕن، جێگیرترین و باوەڕپێکراوترین دامەزراوەی هەرێم کە هیچ گۆڕانکارییەک ناتوانێت لەسەر پێیەکانی ڕایبپڵێنێت، خودی قەیرانەکان خۆیانن.
Leave a Reply