محمد عەلى عەزیز
لە بازاڕی سیاسەتی هەرێمی کوردستاندا، نمایشێکی نوێ دەستی پێکردووە کە تێیدا حیزبەکان ڕۆژانە یاری بە کارتی هاوپەیمانێتییەکان دەکەن بۆ ئەوەی مانشێتی گەورە لە میدیاکاندا دروست بکەن. نزیکبوونەوە و هەماهەنگییەکانی ئەم دواییەی نێوان یەکێتیی نیشتمانیی کوردستان و جوڵانەوەی نەوەی نوێ، نموونەیەکی زەقی ئەم جۆرە مانۆڕە سیاسییانەیە کە ڕەهەندێکی نوێی داوەتە شانۆگەریی دوای هەڵبژاردن. سیاسییەکان بە جۆرێک ئاهەنگ بۆ ئەم هاوپەیمانێتی و لێکتێگەیشتنانە دەگێڕن، وەک بڵێیت کێشەی بێمووچەیی، بێکاری، و نەبوونی خزمەتگوزارییەکان تەنها بە گرتنی وێنەیەکی هاوبەشی دوو سەرکردە چارەسەر دەبێت! ئەگەر بە چاوی هاوڵاتییەکی سادە کە لەسەر شەقامەکان باجی ئەم قەیرانانە دەدات بڕوانینە ئەم دۆخە، دەبینین کە پێچەوانەیەکی تەواو هەیە لە نێوان ئەو مانۆڕە ئیلیت (نوخبە)یانەی کە لە مەکتبە سیاسییەکاندا دەکرێن، لەگەڵ ئەو تووڕەیی و بێئومێدییە قووڵەی کە لەناو دڵی کۆمەڵگادا دەکوڵێت. بۆ سەرکردەکان، هەر ڕێککەوتنێکی نوێ مانای بەدەستهێنانی کەرەستەیەکی بەهێزترە بۆ سەپاندنی مەرجەکانیان لەکاتی دابەشکردنی پۆستەکاندا، بەڵام بۆ هاوڵاتییان، ئەمە تەنها کاتکوشتنێکی بێزارکەرە کە سکی کەس تێر ناکات.
ڕاستییە تاڵەکە ئەوەیە کە هەر هاوپەیمانێتییەکی نوێ تەنها دەتوانێت مانشێت و ژاوەژاوی میدیایی دروست بکات، بەڵام تەنها پەرلەمانێکی کارا دەتوانێت ئەنجامی ڕاستەقینە و یاسا بۆ چارەسەری قەیرانەکان دروست بکات. دەسەڵاتداران پێیان وایە کە بە گۆڕینی هاوکێشە حیزبییەکان و ناردنی پەیامی هەڕەشەئامێز بۆ یەکتری، دەتوانن سەرنجی شەقام لەسەر شکستی دامەزراوەیی وڵات لا بدەن، بەڵام ئارامیی خەڵک زۆر لەمێژە گەیشتووەتە هێڵی سوور. هاوڵاتییان چاوەڕێی ئەوە نین بزانن کێ لەگەڵ کێدا چای خواردەوە و کێ بووە هاوپەیمانی کێ، بەڵکو چاوەڕێی ئەوەن بزانن کەی دەرگای پەرلەمان دەکرێتەوە و کەی حکومەتێک پێکدێت کە بەرپرسیارێتیی ژیانیان لە ئەستۆ بگرێت. کاتێک ئیلیتی سیاسی هێندە نوقمی یارییە تەکتیکییەکانی خۆیان دەبن کە بیر لەوە ناکەنەوە وڵات بەبێ دەزگایەکی یاسادانان بەرەو وێرانبوون دەچێت، ئیتر هاوپەیمانێتییەکان دەبنە تەنها یانەیەکی داخراو بۆ پاراستنی بەرژەوەندییەکان، و پەرلەمانیش دەبێتە قوربانیی ئەو یارییەی کە تێیدا هەمووان براوەن جگە لە دەنگدەر نەبێت!
Leave a Reply