محمد سيامند ئيمام
تابلۆیەک دەبینین کە ئەوپەڕی گاڵتەجاڕی و تراژیدیای حوکمڕانی دەردەخات؛ لەم تابلۆیەدا، هاوڵاتییانی ماندوو و گیرفان خاڵی بە ئومێدێکی کەمەوە بەرەو سندوقەکانی دەنگدان هەنگاو دەنێن بۆ ئەوەی ئەرکی دیموکراسی و نیشتمانیی خۆیان جێبەجێ بکەن، بەڵام هەر ئەوەندەی کە دەنگەکان دەژمێردرێن، چینی سیاسیی دەسەڵاتدار یەکسەر دوگمەی “وەستان” لەسەر ژیانی سیاسی و ئیداریی وڵات دادەگرێت .
ئەو خەڵکەی کە پێیان وابوو بە پەنجەمۆرەکانیان دەتوانن گۆڕانکارییەک دروست بکەن و سیستەمەکە بەرەو پێش ببەن، یەکسەر دەبنە بینەری درامایەکی بێزارکەر و دووبارەبووەوە کە تێیدا سەرکردەکان و براوەکانی هەڵبژاردن بۆ چەندین مانگ و تەنانەت ساڵیش، لەناو ژوورە داخراوەکاندا خەریکی شەڕە دەنووک و دانوستانی بێكۆتایین لەسەر چۆنیەتیی دابەشکردنی پۆستەکان و پاراستنی بەرژەوەندییەکانیان . لێرەدا پرسیارە گەورە و شۆککەرەکە ئەوەیە: ئایا بەڕاستی دەنگدەران هیچ کاریگەرییەکیان لەسەر ئەنجامەکان و شێوازی حوکمڕانی هەیە؟ کاتێک دەبینین کە پێکهێنانی حکومەت و بڕیارە چارەنووسسازەکان هیچ پەیوەندییەکیان بە ویستی خەڵک یان بەرنامەی هەڵبژاردنەوە نییە، بەڵکو تەنیا گرێدراوی ڕێککەوتنی ژێربەژێری نێوان نوخبە سیاسییەکانە کە چۆن کێکەکە لە نێوان خۆیاندا دابەش دەکەن، تێدەگەین کە سندوقی دەنگدان تەنیا ئامرازێکە بۆ شەرعیەتدان بەو قۆرخکارییەی کە پێشوەختە نەخشەی بۆ کێشراوە .
ئەوانەی کە بەردەوام باس لە “سەروەریی گەل” دەکەن، لە ڕاستیدا گەلیان کردووەتە تەنیا ئامرازێک کە هەموو چوار ساڵ جارێک لە خەو هەڵیاندەسێنن بۆ ئەوەی شەرعیەت بە مانەوەیان بدەن، پاشانیش جارێکی تر دەیانخەنەوە ناو بازنەی چاوەڕوانییەکی کوشندە بۆ وەرگرتنی مووچەیەک یان چاککردنی خزمەتگوزارییەکی سەرەتایی . ئەم چەقبەستووییە سیاسییە بەردەوامە نیشانەی ئەوەیە کە سیستەمەکە باکی بە کات و ژیانی خەڵک نییە؛ باوکێک کە چاوەڕێی مووچەیە بۆ کڕینی دەرمانی منداڵەکەی، دەبێت باجی ئەو ململانێیە سیاسییە بدات کە تێیدا دوو حزب لەسەر پۆستی وەزارەتێک ڕێک ناکەون .
تا ئەو کاتەی دەسەڵاتداران پێیان وابێت کە براوەی هەڵبژاردن بۆی هەیە وڵات وەک موڵکی تایبەتی خۆی دابەش بکات و پرۆسەی سیاسی ڕابگرێت کاتێک بەرژەوەندییەکانی لە مەترسیدایە، دەنگدانی هاوڵاتییان تەنیا بەشداریکردنێکی بێمانا دەبێت لە شانۆگەرییەکدا کە پێشتر سیناریۆکەی نووسراوەتەوە و کۆتاییەکەشی هەر براوەبوونی هەمان ئەو کارەکتەرانەیە کە هۆکاری سەرەکیی نەهامەتییەکانن
Leave a Reply