ئیبراهیم ئازاد
خەڵکی شەقڵاوە زۆر باش لە جوانیی سروشتی ناوچەکەیان و مێژووی شارەکەیان تێدەگەن. ئەوان هیچ پێویستییەکیان بەوە نییە کە کاتی هەڵبژاردنەکان، سیاسەتمەدارێک بە جلی کوردییەوە بچێتە سەر لوتکەی چیای سەفین و لەبەردەم کامێراکاندا وتارێکی حەماسییان پێشکەش بکات سەبارەت بەوەی “شەقڵاوە بووکی کوردستانە.” ئەوەی ئەم خەڵکە دەیانەوێت، وەڵامی پرسیارێکی زۆر سادە و ڕاستەوخۆیە: کوا ئەو گەشەپێدانە و ئەو “کوردستانە مۆدێرنە”ی کە لە کەمپەینەکانی هەڵبژاردندا بەڵێنتان پێدا؟ شەقڵاوە و ناوچەکانی دیکەی کوردستان پێویستیان بە دامەزراوەی کارا، خزمەتگوزاریی ڕاستەقینە، ژێرخان، ئاوەڕۆ و کارەبا هەیە، نەک ئەوەی بکرێنە “ژووری چاوەڕوانیی سیاسی” کە تێیدا خەڵک ساڵانێک چاوەڕێی هاتنەدیی بەڵێنەکان بکەن و لە کۆتاییدا هیچیان دەست نەکەوێت.
ئەوەی شەرمەزارکەرترە، ئەو تابلۆ سیاسییە ئیفلیجکراوەیە کە دەسەڵاتداران نمایشی دەکەن. پرسیارە گەورەکە لێرەدا ئەوەیە: کاتێک حزبە سیاسییەکان تەنانەت توانای ئەوەیان نییە لەسەر کردنەوەی دەرگای پەرلەمان، پێکهێنانی حکومەت، و دابەشکردنی پۆستەکان ڕێکبکەون، ئیدی چۆن و بە چ لۆژیکێک دەیانەوێت ئەو شارە مۆدێرنانە بونیات بنێن کە بەڵێنیان بە خەڵک داوە؟ کاتێک سیستەمێک نەتوانێت مووچە دابەش بکات و ململانێی ناوخۆیی چارەسەر بکات، بێگومان ناتوانێت شەقڵاوە بکاتە ناوەندێکی گەشتیاریی نێودەوڵەتی. ئەم جۆرە حوکمڕانییە وای کردووە کە هاوڵاتی تەنیا وەک دەنگدەرێک سەیر بکرێت کە دوای تەواوبوونی هەڵبژاردن، بە تەواوی فەرامۆش دەکرێت.
ڕەنگە کاتی ئەوە هاتبێت کە سیاسەتمەدارەکان دەستکاریی کەمپەینەکانی داهاتوویان بکەن. لە جیاتی ئەوەی دروشمی گەورە و خەیاڵی وەک “پەرەپێدانی شەقڵاوە و ڕاکێشانی ملیۆنان گەشتیار” بەرز بکەنەوە، زۆر ڕاستگۆیانەتر و لۆژیکیترە ئەگەر تەنیا یەک بەڵێنی بچووک بدەن: “بەڵێن بێت، دوای هەڵبژاردن لەبیرمان بێت کە شارێک بەناوی شەقڵاوە لەسەر نەخشە بوونی هەیە!” چونکە بۆ دەسەڵاتێک کە لە ناو ململانێکانی خۆیدا ون بووە، لەبیرنەکردنی خەڵک گەورەترین دەستکەوتە.
Leave a Reply