سەرەتا دەبێت بەو پرسیارە دەستپێبکەین کە ئایا دۆخی پەروەردە لەهەرێمی کوردستان لەچ ئاست و بارودۆخێکدایە؟ حکومەت چیکردووە و چی دەکات بۆ بەرەوپێش بردنی کەرتی پەروەردە لە هەرێمی کوردستان ؟
بیرمەندێکی پەروەردەی ئەمریکی دەڵێت: (پەروەردە ژیانە، نەک ئامادەکردن بۆ ژیان، پەروەردە گرنگترە لە زانیارییەکان، گرنگترە لە چۆنیەتی بیرکردنەوە)
کەواتە هەر کۆمەڵگەیەک تا پەروەردە نەخاتە پێشەوە و نەیکاتە هەنگاوی یەکەمی چارەسەری گرفتەکانی خۆی، هیچ کاتێک ئارامی و خۆشنودی و ژیاری نابینێت.
زیاتر لە سی و پێنج ساڵە ژیانی کۆمەڵگەی کوردی بەهۆی بێ پلانی و گەندەڵی و خراپ بەکارهێنانی پێگە و پایەکانی شێوازی حوکمڕانی لە هەرێمی کوردستاندا لە لایەن دوو پاتی دەسەڵاتداری یەکێتی و پارتی، شێواوی و پاشاگەردانی و عەقڵی تەسک و بچوکی خێڵگەرایی و ئابوری بەناو سەربەخۆ، خەڵکی ئەم هەرێمەیان توشی داڕمان و بێ ئومێدی و گرفتی گەورە کردووە، سێکتەری پەروەردەش وەک هەموو بەش و سێکتەرەکانی دیکە بێ خزمەت و پەراوێزخراوە و لەوپەڕی وێرانیدایە.
هۆکاری یەکەمی گرفتەکانی پەروەردەش ڕاستەوخۆ پەیوەندی بە وەزیری پەروەدەوە هەیە، توانای چارەسەرکردنی گرفتەکانی نییە و تەنانەت ڕێگەش نادات پسپۆر و شارەزایانی پەروەدەیی ڕۆڵی خۆیان بگێڕن لە چاککردنی سیستەمی پەروەردە و فێربوون، جەنابی وەزیر ئەوەندەی سەرقاڵی موزایەدەی حزبی و چالاکی حزبییە، ئەوەندە سەرقاڵی داڕشتنی پلانێکی تۆکمە نەبووە بۆ ڕاستکردنەوەی ڕێڕەوی پەروەردە لە هەرێمی کوردستان.
شایەنی باسە قەیرانی پەڕوەردە لە هەرێمی کوردستان لەم چەند خاڵەدا کۆ دەکرێنەوە:
١- نزمی ئاستی خوێندن و زانستی قوتابیان.
٢- نەبونی پلانی باش بۆ بەرزکردنەوەی توانایی مامۆستایان.
٣- کەمی بودجەی پەروەردە.
٤- گرنگی نەدان بە پرۆسەی پەروەردە و فەلسەفەی پەروەردەیی.
٥- تێکەڵکردنی پرۆسەی پەروەردە بەمەبەستی بەرژەوەندی تایبەت و بازرگانی.
٦- بوونی کێشە وگرفت لە بەشەکانی هەیکەلی وەزارەتی پەروەردە.
٧- نەبوونی پلانێکی داڕێژراوی تاقیکراوەی پەروەردەیی لە پێناو کوالێتی بەرزی خوێندن و فێربوون.
٨- گرفتی خراپی پرۆگرامەکان و نەگونجاندنیان لەگەڵ ژیان و ژیاریدا.
٩- نەبوونی پەروەردەیەکی گونجاو لەگەڵ پێداویستییەکانی سەردەم وەک بەکارهێنانی تەکنەلۆژیا و هۆکارەکانی تر.
هەروەها بۆ چارەسەرکردنی قەیرانی پەروەردە پێویستە ئەمانە جێبەجێبکرێت:
وەک دەزانن پەروەردە بەهێزترین چەکە بۆ گۆڕینی جیهان و گەشەی مرۆڤایەتی، هەربۆیە بۆ دەرچوون لە قەیرانی پەروەردە، پێویستە ئەمانە جێبەجێبکرێت:
١- باشترکردنی دۆخی ژیانی مامۆستایان لە ڕووی دارایی و کۆمەڵایەتییەوە.
٢- دانانی شکۆ و ڕێز بۆ مامۆستایان وەک پارێزبەندی.
٣- ڕاهێنانی بەردەوامی مامۆستایان و خولی بەهێزکردن بۆیان.
٤- دۆزینەوەی سەرچاوەی داهاتی نوێ بۆ پەروەردە.
٥- گرنگیدان بە گەشەی کەسایەتی قوتابی و بە چەقکردنی لە پرۆسەکەدا.
٦- پەروەردەی ئاکاری و نیشتمانی دابینکردنی دەرفەتی یەکسان بۆ هەمووان.
٧- لابردنی کۆسپەکانی بەردەم پرۆسەی پەروەردە و فێربوون.
Leave a Reply