شهرام خالید عبدولڕحمان
ئەگەر لە دونیادا پێوەرێک هەبێت بۆ پێوانەکردنی دووڕوویی سیاسی و گەندەڵی، ئەوا عێراق دەبێتە پاڵەوانی بێڕکابەری ئەو بوارە. لە کاتێکدا فەرمانبەران و مامۆستایانی هەرێمی کوردستان بۆ چەندین مانگ بێمووچە و بێ پارەن و لەژێر هێڵی هەژاریدا دەناڵێنن، بەغدا بەوپەڕی بێشەرمییەوە پێیان دەڵێت “پارەمان بۆ مووچەکانتان نییە”. بەڵام لە هەمان کاتدا و لەناو دڵی هەمان ئەو حکومەتەدا، گەورەترین ئابڕووچوونی مێژوویی ئاشکرا دەبێت کە تێیدا ٢.٥ تریلیۆن دینار (نزیکەی ١.٩ ملیار دۆلار) بە شێوەیەکی نهێنی و لەژێر ناوی “پارەی چاودێریی کۆمەڵایەتی” دیار نامێنێت و لەنێوان وەزارەتی دارایی و بانکی ڕافیدەیندا بەبێ هیچ ئاگادارکردنەوەیەک ئاڵوگۆڕی پێ دەکرێت ! ئەمە جگە لەو ئابڕووچوونەی تر کە پێی دەوترێت “دزیی سەدە”، کە تێیدا بڕی ٢.٥ ملیار دۆلاری تر لە باجەکانی حکومەت لەلایەن چەند کۆمپانیایەکی سێبەرەوە دزرا.
کاتێک باس دێتە سەر دزینی ملیاران دۆلار لەلایەن مافیاکانی ناو دەسەڵاتی بەغداوە، سیستەمی بانکی و دامەزراوەکان زۆر بەباشی و بەوپەڕی نهێنییەوە کار دەکەن بۆ ئاسانکاریکردن بۆ دزەکان. بەڵام کاتێک باس دێتە سەر مووچەی ڕەوای فەرمانبەرێکی کورد، وەزارەتی دارایی عێراق لەپڕ دەبێتە “پارێزەری یاسا و دەستوور” و بیانووی ئەوە دەهێنێتەوە کە گوایە حکومەتی هەرێم (KRG) داهاتی ناوخۆ و نەوتی ڕادەست نەکردووە، بۆیە پارەیان پێ نادەن. ئەمە تەنها دووڕوویی نییە، بەڵکو سزایەکی سیاسییە بۆ بەکارهێنانی قووتی خەڵکی هەژار وەک چەکێک لە ململانێی نێوان هەولێر و بەغدادا. چۆن دەکرێت پارە هەبێت بۆ دزین و ونبوون لەناو بانکەکانی حکومەتدا یان بۆ دابینکردنی مووچەی میلیشیاکانی حەشدی شەعبی، بەڵام پارە نەبێت بۆ فەرمانبەرێک کە تەنها داوای مافی خۆی دەکات؟
ئەم دژ یەکە ئازاربەخشە دەریدەخات کە هەردوو حکومەتی بەغدا و هەولێر لە یەک بازنەی گەندەڵیدا دەسوڕێنەوە. بەغدا پارەی گەورەترین سندوقەکانی چاودێریی کۆمەڵایەتی (کە بۆ هەژارترین چینی کۆمەڵگە تەرخان کراوە) دەدزێت یان بەنایاسایی بەکاریدەهێنێت ، و لەولاشەوە حکومەتی هەرێم ئامادە نییە شەفاف بێت لە داهاتەکانی خۆیدا تا بیانوو بداتە دەست بەغدا بۆ بڕینی مووچەی خەڵک. لەم هاوکێشە قێزەونەدا، ئەوەی دەدزێت دەبێتە پاڵەوان و ئەوەی داوای مافی خۆی دەکات دەبێتە قوربانی.
Leave a Reply