دوو ژن.. لەڕۆژهەڵاتی ناوەڕاستدا، زۆر زەحمەتە هەم "ژن" بیت‌و هەم "کەمایەتی‌"

بینراوە: (4.7K)

سەردار محەمەد

لەڕۆژهەڵاتی ناوەڕاستدا، زۆر زەحمەتە هەم “ژن” بیت‌و هەم “کەمایەتی‌”، هەم “پابەند بیت بەلۆکالی بوون‌و رەسەنایەتی” خۆتەوەو هەم “بشتوانیت بەو ئەندازەیە کاریگەر بیت کە لەئاستی جیهاندا” بناسرێیت، وەک “فەیروز”و “لەیلا زانا”.

فەیروزو لەیلا، دوو ناوی درەوشاوەن، کە بەهەڵوێست‌و پێداگرییان لەسەر خۆڕاگریی‌و مانەوە لەزێدو نیشتمانی خۆیان، سەڕەرای هەموو سەختی‌و مەترسییەکان، بوون بە”ئایکۆن”و سەرمەشقی کۆمەڵگەکانیان.

🔴 فەیروز
فەیروز، بەئەندازەیەک هێژاو گەورەیە کە هەرچییەک دەربارەی بووترێت، هێشتا “کورت ئەیهێنێت”.

ئەو بەدەنگە سیحرئامێزو ئەفسانەییەکەی، کە وەک لوبنانییەکان دەڵێن “نەغمەیەکە لەبەهەشتەوە دێ‌و دەڕژێتە رۆحی شەکەتی مرۆڤەوە”، لە”قاوەی بەیانیان” بەچێژترە، هەموو رۆژێک کە خۆر پاش ئاوابوونی شەوێکی تاریک هەڵدێ، فەیروز لەبەغداوە تا شام، لەبەیروتەوە تا پاریس، “شاژنی بەیانیان”ە.

بەڵام گەورەیی‌و جوانیی فەیروز، هەر بەهونەرە ئاست بەرزەکەیەوە ناوەستێ، بەڵکو ئەوە شێوازی ژیان‌و هەڵوێستە بەنرخەکانی بوون کە ئەویانکرد بە”ئایکۆنی لوبنان”.
فەیروز، سەر بەخێزانێکی مەسیحییە، کە ١٠٠ ساڵە لەڕۆژهەڵاتی ناوەڕاستدا قەتل‌و عام دەکرێن‌و لەکۆچێکی بەردەوامدان‌‌.

ئەم ژنە بوێرە، لەرۆژگارێکدا کە بەیروت لەئاگری جەنگی ناوخۆدا دەسووتاو کار لەسەر ئەوە دەکرا لوبنان بەتاڵ بکرێتەوە لەمەسیحییەکان‌‌و هەرچی هونەرمەندو ئەکتەرو نوسەرو خەڵکی وڵاتەکەی بوو، فڕکان فڕکانیان بوو کامیان زووتر لوبنان بەرەو ئەوروپاو ئەمەریکا بەجێبهێڵن، ئەو نەک هەر لوبنانی بەجێنەهێشت، بەڵکو لەو رۆژگارە سەخت‌و پڕ لەزەبروزەنگەدا جوانترین گۆرانییەکانی “سلام لبیروت”و “بحبک یا لوبنان”ی پێشکەشکرد، کە جۆرێک لە”شفا” بوون بۆ ئازارو دەردی لوبنانییەکان‌.

فەیروز، بەدرێژایی جەنگی ناوخۆش، خۆی لەسەر هیچ حزب‌و لایەنێکی سیاسی ساغ نەکردەوەو لەبەرژەوەندی هیچ حزب‌و لایەنێکیش هەڵوێستی وەرنەگرت، وەک وەلید جانبولاد دەڵێت “فەیروز زۆر لەوە گەورەتر بوو، حزبێک بیکات بەهی خۆی”.

فەیروز، ئامادەش نەبوو لەژیانی هونەری خۆیدا بۆ “پارەو شاباش”، بەشان‌و باڵی هیچ سەرۆک‌و پاشایەکی وڵاتانی عەرەبیدا هەڵبداو گۆرانیان بۆ بڵێت، ئەو دەنگی “عەشق‌و ئازادی‌و نیشتمان” بوو.

جوانییەکەی دیکەی فەیروز ئەوەیە کە هەرگیز عاشقی “خۆدەرخستن‌”و “خۆنمایشکردن” نەبووە، کەمترین “دەرکەوتن‌”و کەمترین باسی خۆی‌و چاوپێکەوتنی لەژیانیدا کردووە، تەنانەت پێشنیاری “ملیۆنێک دۆلار”ی کەناڵێکی وەک “جەزیرە”ی لەبەرامبەر چاوپێکەوتنێکی تایبەتدا رەتکردوەتەوە، هەربۆیە ئەم خانمە میهرەبانە کە ژیانی تایبەتی چەند پڕ لەشکۆمەندییە، ئەوەندەش پر لەخەم‌و کارەساتە‌و چەندین ساڵە بەدوور لەژاوەژاوی میدیاکان ژیانی بەسەردەبات، بە”خانمی بێدەنگی” ناودەبرێت‌.

لەخۆڕا نییە کە تا ئێستاش، جیهان ئەو “لوبنانە شەکەت‌و ماندووە”، لەڕێگەی “فەیروز”ەوە زیاتر دەناسن، تا لەڕێگەی سەرکردەو سیاسەتمەدارە گەندەڵەکانییەوە.

🔴 لەیلا

لەیلا زانا، یەکێکە لەو ژنە کاریگەرو بوێرانەی کە مێژووی هاوچەرخی کورد بەخۆیەوە بینیویەتی، ئەو کە لەسەر “کوردبوون”، ١٠ ساڵ خرایە کونجی زیندانەوە، بوو بەسیمبولی خەباتی میللەتێک‌.

لەیلا، کە لەهەڵبژاردنەکانی ١٩٩١دا، وەک یەکەمین ژنی کورد چووە پەرلەمانی تورکیاوەو بەکوردی سوێندی خوارد، سزای ١٥ ساڵ زیندانیکردنی بەسەردا سەپێنرا، ئەوکات دەیتوانی وەک زۆرێک لەو خەڵکە ناڕازییە، وڵات بەجێبهێڵێ‌و بەرەو دەرەوەی وڵات هەڵبێ‌، بەڵام بەوپەڕی ئازایەتی‌و لەخۆبردوییەوە چووە بەردەم دادگاو خرایە زیندانەوە.

گرنگی ئەم هەنگاوەی لەیلا، لەوەدا بوو کە لەژاروژەنگی ئەو رۆژگارەدا کار لەسەر چۆڵکردنی باکوری کوردستان لەدانیشتوانە رەسەنەکەی دەکرا لەڕێگەی ناردنیانەوە بۆ ئەوروپا، لەیلا وتی “کوردستان وڵاتی هەمیشەیی منە، دەبێ بەو داخەوە سەر بنێنەوە من کوردستان بەجێبهێڵم”.

دوای ئازادکردنیشی، چەند جارێک دۆسیەی دادگایی کردنی بۆ کرایەوەو تۆمەتبار کرا بۆ ئەوەی “بڕوات”، بەڵام لەیلا باکی بەو سزایانە نەبووەو هەمیشە وتویەتی “ئاوات دەخوازن‌ ئەم سزایانە واملێبکات وڵات بەجێبهێڵم‌، بەڵام من بەو داخ لەدڵانە دەڵێم: بەڵێنم داوە تا دوا هەناسەی ژیانم لێرە ناڕۆم‌”.

لەیلاش، یەکێکە لەو ژنە هێژایانەی کە حەزی بەخۆدەرخستن‌و بەر کامێراو “خۆ نمایش کردن” نییە، ئەو لەو جۆرە مرۆڤانەیە کە لەژیانیاندا “قسەی کەم‌و کاری زۆر دەکەن”، پێویست نەکات نادوێ‌و پێویستیش نەکا دەرناکەوێت.

لەیلا، کە بەرگەی زۆر ئازاری گرتووەو ژیانی پڕاوپڕە لەئیرادەو خۆڕاگریی، هەمیشە کاری لەسەر ئەوە کردووە هێزە کوردییەکان پەرتەوازەو ناکۆک نەبن‌، زۆرجار باجی ئەم هەڵوێستەشی داوە، کە زۆرجار بەدەنگێکی پەژارەهێنەوە ویستویەتی ئەم پەیامە بگەیەنێت: “ئەگەر پەکەکەو پارتی کۆک بن من لەگەڵ هەردووکیانم، ئەگەر ناکۆک بن لەگەڵ هیچ کامیان نیم، ئەگەر شەڕ بکەن، من لەدژی هەردووکیانم”.

ڕوونکردنەوە :

بۆچوونەکانی ئەم وتارە وەک هەڵوێستی فەرمی دامەزراوەی بنکۆڵ نییە و بە هیچ شێوەیەک پەیوەندى بە سیاسەت و پرەنسیپەکانیەوە نییە . تەواوی بەرپرسیارێتى یاسایی، ئەکادیمی و پیشەیی لەسەر نووسەرەکەیەتی.