هاوکار سەردار عومەر
لە مێژووی حوکمڕانیی نوێدا، کەم دەوڵەت یان هەرێم هەن لە جیهاندا کە وەک هەرێمی کوردستان خاوەنی خەزێنەیەکی هێندە دەوڵەمەندی ژێرئەرز لە نەوت و گاز بن، کەچی دوای دەیان ساڵ لە دەرهێنان، هەناردەکردن و کۆنترۆڵی تەواوەتیی سیاسی، هێشتا کێشەی سەرەکی و ڕۆژانەی هاوڵاتییەکانی تەنها دەستکەوتنی بەنزینێک یان نەوتێک بێت بە نرخێکی گونجاو. ئەم واقیعە شەرمەزارکەرەی کە لە سایەی کابینەکەی مەسرور بارزانی و دەسەڵاتی دەیان ساڵەی حیزبەکاندا خوڵقێنراوە، تەنها تەنگژەیەکی ئابووریی کاتی یان کێشەیەکی تەکنیکیی بازاڕ نییە وەک ئەوەی میدیا فەرمییەکان هەوڵی ڕوونکردنەوەی دەدەن، بەڵکو بەڵگەیەکی حاشاڵێنەکراو و زەقە لەسەر فەشەلی بنەڕەتی و داڕمانی جەوهەریی سەرتاپایی سیستمی سیاسی لە کوردستاندا. چۆن دەکرێت هەرێمێک کە ڕۆژانە سەدان هەزار بەرمیل نەوتی هەناردەی بازاڕەکانی جیهان کردووە و ملیۆنان دۆلاری لەو ڕێگەیەوە بەدەستهێناوە، نەیتوانیبێت کۆمەڵێک پاڵاوگەی نیشتمانیی نوێ و ئابوورییەکی سەربەخۆ دروست بکات کە لانی کەمی پێداویستییەکانی ناوخۆ بە سوتەمەنیی هەرزان و کوالیتی بەرز دابین بکات؟ پرسیارە جەوهەرییەکە کە دەبێت ڕووبەڕووی سەرکردەکانی دەسەڵات بکرێتەوە ئەمەیە: دوای ئەم هەموو سالە لە فرۆشتنی سەربەخۆی نەوت و کۆنترۆڵکردنی تەواوەتیی داهاتەکان، بۆچی دەبێت هێشتا هاوڵاتییەک لەسەر خاکی خۆی و لەسەر دەریایەک نەوت، شەڕی چەند هەزار دینارێک بکات بۆ پڕکردنی تانکیی ئۆتۆمبێلەکەی یان گەرمکردنەوەی ماڵەکەی لە زستاندا؟
ئەم تێکچوونە قووڵەی نێوان سامانی سروشتیی هێگبەی نیشتمان و هەژاریی بەردەوامی جەماوەر، نیشانەی مۆدێلێک لە حوکمڕانییە کە تێیدا داهاتی گشتی کورتکراوەتەوە بۆ قۆرخکاریی حزبی، باڵادەستیی کۆمپانیا سێبەرەکان، و پڕکردنی هەژماری بانکیی دەستەیەک بەرپرس. کاتێک دەسەڵاتی سیاسی نەتوانێت سەرەتاییترین بەرهەمی خاکی خۆی بە نرخێکی گونجاو بگەەیەنێتە دەستی هاوڵاتییەکانی، بەڵام لە دروستکردنی باج، ڕسوومات و زۆربوونی ئەرکە داراییەکان لەسەر شانی خەڵک وەک کاتژمێر کار بکات، باوەڕی جەماوەر بە سەرتاپای پرۆسەی سیاسی و دروشمە نەتەوەییەکان بە تەواوەتی هەڵدەتەکێت. هێشتنەوەی خەڵک لە باری چاوەڕوانی و نیگەرانیی بەردەوامدا بۆ دابینکردنی پێداویستییە بنەڕەتییەکانی وەک سوتەمەنی، ئاو و کارەبا، تکتیکێکی نەگریسە بۆ دابەزاندنی ئاستی داواکارییەکانی کۆمەڵگە، تا لە جیاتی داواکردنی مافی سیاسی، ئازادی و لێپرسینەوە، تەنها داوای مانەوە لە ژیاندا بکەن. بەڵام ئەم بێباکییە ناتوانێت بۆ هەتاهەتایە ڕاستییەکان پەردەپۆش بکات. کۆتایی ئەم کارەساتە سیاسییە، حەقیقەتێکی زەقمان بەڕوودا دەکێشێتەوە کە هیچ ڕاگەیەندراوێکی فەرمی ناتوانێت بڕواپێکراوی بۆ بگەڕێنێتەوە: وڵاتێک کە خاوەنی نەوت بێت بەڵام خەڵکەکەی لەسەر نرخی سووتەمەنی تووشی شۆک و داڕمان ببێت، حکومەتەکەی نەک هەر فەشەلی لە ئیدارەدانی ئابووریدا هێناوە، بەڵکو تەواوی شەرعییەتی ئەخلاقی و سیاسیی خۆی بۆ بەڕێوەبردنی کۆمەڵگە لەدەستداوە.
Leave a Reply